لوحة مفتاح تبديل ألي

ال ATS هو اختصار لكلمة Automatic Transfer Switch اللي هو مفتاح التحويل الاوتوماتيك فلوحة ال ATS بتكون عبارة عن لوحة تحكم كهربائية بتحتوي على دائرة باور و دائرة كنترول فدائرة الباور فيها بيكون ليه مدخلين منفصلين من مصدرين تغذية مختلفين فالمصدر الاول بيكون من مصدر الكهرباء الرئيسي اللي جاي من شركة الكهرباء و هو ال main source و المصدر التاني بيكون احتياطي او stand by فبيكون من مولد الطوارئ اللي هو diesel generator.

 

ففكرة عمل ال ATS ده هو انه لما بيحصل انقطاع للتيار الكهربي من المصدر الرئيسي بيتم تحويل الاحمال الكهربية المربوطة عليه للتغذية من المصدر الاحتياطي اللي هو ال diesel generator و التحويلة دي بتشتغل في حالة انقطاع التيار او انخفاض الجهد عن الحد المسموح بيه لتشغيل الاحمال الكهربية.

 

و بتتكون لوحة ال ATS من دائرة قوى و دائرة تحكم فدائرة القوي بتتكون من قاطع كهرومغناطيسي و اتنين كونتاكتور الكونتاكتور الاول بيتركب مع الكابل اللي جاي من المصدر الرئيسي اللي جاي من الشبكة العمومية و الكونتاكتور التاني بيتركب مع الكابل اللي جاي من المصدر الاحتياطي اللي هو ال diesel generator و الاتنين كونتاكتور دول بيكونوا مربوطين مع بعض و لكن في بينهم حماية كهربية electrical lock و حماية ميكانيكية mechanical lock بحيث ان الاقفال دي بتخلي مصدر واحد بس هو اللي متصل و شغال و المصدر التاني بتخليه في حالة فصل علشان يمنعوا المصدرين من انهم يشتغلوا في نفس الوقت و ان الاحمال متتغذاش من المصدرين في نفس الوقت علشان ميحصلش short circuit يؤدي لتدمير الاحمال الكهربية و حرقها .

 

اما دائرة التحكم فبتتكون من relays علشان تحس بانقطاع التغذية الكهربية علشان تبدأ تدي اشارة علشان تنقل الاحمال للتغذية الاحتياطية اللي جايه من المولد عن طريق التشغيل الاوتوماتيكي للمولد و كمان بتحتوي على تايمرات من نوع ondelay timer و لمبات اشارة و اجهزة قياس زي فولتميتر و الاميتر بيكونوا متركبين على مصدرين التغذية و بتحتوي اللوحة كمان على مفاتيح تشغيل.

 

فبتحتوي لوحة ال ATS على نظامين تشغيل الاول هو نظام التشغيل اليدوي اللي هو ال manual و التاني هو نظام التشغيل ال automatic و بتقدر تختار وضع التشغيل ما بينهم عن طريق مفتاح التشغيل اللي بيكون موجود في لوحة ال ATS.

 

فبتحتوي لوحة ال ATS على مفتاح ليه 4 اوضاع فالوضع الاول هو ال off و في الوضع ده بيتم فتح كونتاكتور التغذية و كونتاكتور المولد و يتم فصل الكهرباء عن الاحمال و الوضع التاني هو وضع الكهرباء الرئيسية و في الوضع ده بيتم تشغيل كونتاكتور الكهرباء الرئيسية و فصل كونتاكتور المولد و الوضع التالت هو وضع المولد و في الوضع ده بيتم تشغيل كونتاكتور المولد و فصل كونتاكتور الكهرباء الرئيسية و ال 3 اوضاع دول بيستخدموا في حالة التشغيل اليدوي للوحة ال ATS اما الوضع الرابع فهو بيستخدم في حالة التشغيل الاوتوماتيك للوحة و هو وضع الاوتوماتيك ففي الوضع ده بيكون كونتاكتور الكهرباء الرئيسية مغلق و شغال و كونتاكتور المولد مفتوح و فاصل و فلما بتحس دائرة الكنترول بانخفاض الجهد او انقطاع التيار من مصدر الكهرباء الرئيسي لمدة من الوقت بيكون مظبوطة عليها اللوحة بترسل اللوحة اشارة بفصل و فتح كونتاكتور الكهرباء الرئيسية و توصيل و غلق كونتاكتور المولد و بيتم تشغيل الاحمال و تغذيتها عن طريق المولد و في حالة احساس دائرة الكنترول برجوع الكهرباء الرئيسية بتبدأ ترسل اشارة تاني لفتح كونتاكتور المولد و غلق كونتاكتور الكهرباء الرئيسية و تحويل تغذية الاحمال للكهرباء الرئيسية.

طب ازاي لوحة ال ATS بتشغل المولد في حالة انقطاع التيار ؟

لما بتحس لوحة ال ATS بانقطاع التيار الكهربي من المصدر الرئيسي بتبدأ تعد الزمن اللي بتظبطه عليه و الزمن ده بيكون ثواني لان ممكن الكهرباء الرئيسية ترجع بسرعة فلما يمر الزمن ده و تلاقي الكهرباء الرئيسية لسه مرجعتش بتبدأ دائرة التحكم بتوصيل امر التشغيل الى دائرة بدء التشغيل علشان يبدأ تشغيل و دوران المولد لحد ما يولد المولد لسرعته المحددة بيقوم حساس السرعة و دائرة التحكم بفصل دائرة بدء التشغيل علشان تحميها من التلف و الحرق لحد ما يوصل المولد للسرعة بتاعته و يولد الجهد المطلوب بيبدأ مفتاح ال ATS بتحويل الحمل من الكهرباء الرئيسية للمولد بحيث ان يتم تغذية الحمل من المولد.